紅豆冰與凍檸水

今日，嘍囉一如平日，在樓下間「巨型不知時日過」食午飯，食到無咩好食，隨便叫左個什扒飯跟燒汁。

正在用刀將牛扒和雞扒肢解時，鄰座的一對母子為左買紅豆冰與凍檸水的問題「熱烈地」對話著。

嘍囉橫眼望望，認出那位母親原來是在我住的大廈做清潔的，平日碰面時都會打招呼。

嘍囉一面「留意」他們的對話，一面將煎都乾哂o既牛扒放入口中。

原來靚仔唔鍾意飲跟餐個紅豆冰，要飲凍檸水，不過就唔滿意佢亞媽買飛時左問右問，左改右改，都唔肯分開order杯凍檸水比佢。

嘍囉心想，我靚仔時都係咁。

之後靚仔出左去囉餐，亞媽就無奈咁同身邊D朋友講：「又係個衰仔話鍾意落黎食...」

嘍囉靚仔時都好鍾意係呢間野度食架，仲最鍾意食什扒飯添！

「‧‧‧佢個餐杯紅豆冰唔改得嘛，咪改我o個杯做凍檸水，佢唔鍾意飲紅豆冰咪我飲囉，另外叫杯要9個半架嘛。」

呢個問題，我都係出左黎做野先至明白。

嘍囉將碟上最後一口飯混上燒汁放入口中，除了咸味之外，吃不出別的味道。

「點解我以前會咁鍾意食o既？」

這個迷，相信秋官加上迷女郎都不可能解答到。

突然想起，原來已經有一年多沒有食過嘍囉媽煮o既飯。

拿起電話，撥出一個有點陌生的號碼。

「喂，老媽子，今晚上你度食飯得唔得呀？」