夜間突攝美租界

近日帶備數碼相機在身，早到左開工前無聊亂影，全部用傻瓜無腦夜拍模式拍攝。

貪嗔痴

睇中左個六百幾銀o既notebook背囊，因為價錢超出左預算，所以四出打探有冇門路可以平d入手，點知就比太陽蛋問我知唔知咩叫貪嗔痴。

哈哈，貪嗔痴，三樣都係負面o既野，我諗無人會想同佢扯上關係，不過現實上，當今世界的繁華景象，就係全靠呢三樣野建立出黎。

睇完大「大崩壞」呢本書，知道歷史上好多文明消滅的原因，都係因為貪嗔痴三個字。

在浩瀚的歷史洪流中，即使你知道目前的方向最終會走向滅亡，但人類今日的成就，全是建基於貪嗔痴，人的本性如是，個人的醒覺完全無能為力。如果勉強要去改變人的本性，算唔算係另一種貪嗔痴呢？

就讓我快活地繼續合乎本份地去貪嗔痴吧，最多我十次之中貪少一兩次喇。

摩菲定律在維苑

嘍囉只係想食餐好D，點知連個天都唔鍾意我，以下係嘍囉在葵芳維苑餐廳的經歷：

1.唔記得放底杯水，咁啱嘍囉好口渴，同侍應講左之後佢用好滋柔淡定0既速度比左杯水我；

2.餐牌上冇LIST特價晚餐，咁啱嘍囉係睇左門口個水牌，想食其中一個餐而黎，想再睇清楚D先ORDER都唔得，咁就出左事喇；

3.上餐包冇牛油，嘍囉唯有囉隔離張吉枱上面0既；

4.主菜到喇，答左佢要洋蔥汁，都可以淋錯左磨菇汁，好野；

5.再睇真D，我明明係ORDER左雞扒大蝦，點解變左豬扒龍脷柳架？

6.之後再一碟野對比我，「唔好意思，出面寫錯左，特價餐係豬扒龍脷柳，冇搞錯到」。吓，我想點過第二樣得唔得呀，我想食雞扒大蝦，比正價冇問題喎，仲有我可能係回教徒，同埋食龍脷柳會疴油架喎，點算？本來想發佢難，但見年青哥仔佢一面誠懇，完全唔似耍緊我，睇黎都係比同事點出黎送死，唉！於心何忍，而且亦唔想幫人做免費TRAINING，算數，早D食完早D走。

7.最後埋單找數$53，當中包括$0.2貼士。

早知去對面波濤冇咁嬲。

下水禮

又到四月，公眾泳池已經開放，係時候去下水。可惜與太陽蛋一海之隔，唯有自己一個人去行下水禮。今朝天陰陰冇乜人，成個池內的人數一隻手五隻手指都數得哂，真係你想點游都得。人到中年，又無游成半年，唔敢咁博命，唔係「卒」死左點算，係咁二游左十二個池總共600米就收工，游完之後係水入面都唔覺得點，一爬上水就覺得成個人重左好多咁，但攰得黎個人好精神好爽。之後去老麥嘆杯咖啡打下PSP大戰略，呢D咁先至係優質生活嘛。

快樂的嘍囉

快樂是什麼？

錢不可以使人快樂，不過沒有錢卻會令人很痛苦。此刻，嘍囉有份尚算穩定的工作，不用擔憂生活，所以在金錢上沒有煩惱。

在工作上，沒有什麼壓力，只要做好本份，交足功夫，沒有人會給你找麻煩。毎天準時放工，之後可以放下所有工作，不用將工作帶回家。雖然沒有什麼前景可言，不過嘍囉樂於安於現狀，因為我天生是一名嘍囉。

閒時打下機，睇下動漫畫，再通宵睇下日劇，又學下日文，再可以在班房內用日語向同學們胡扯一番。可以自由地做自己愛好的事情，相信古今不少偉人豪傑，都會自嘆不如此刻的嘍囉。

趁快樂仍在，此刻無價，立此存照。

十蚊扭一扭

早兩日在玩具反豆城扭左部迷你Saturn連遊戲一隻，有得扭是餘仲有得做勞作，隻CD和盒面的貼紙要自己貼，嘍囉最愛做這等手作工夫，這十蚊用得非常爽的說。

雖然只是十蚊貨色，這部迷你Saturn也造十分精細，有齊所有插座、機底label上的文字很清晰，CD Tray的蓋可以打開和放入CD，連後面save card插口的蓋也可以打開。十蚊可以造到如此情度，廠商還可以有空間賺錢，世界工廠真是名不虛傳。

發表完了

經過多日的準備，終於到了要發表的日子。連日來一有空閒就背一次，因為內容全部都是寫有關自己的東西，而又是由自己一手所寫，所以要背熟全文沒有什麼困難。不過要流暢地背誦一次，就要記住多個辭彙的發音，在此花了不少時間。

到了今晚發表時，站在同學們面前，心情難免有點緊張，雖然最後都順利完成了發表，不過始終忘記了控制速度而講得太快，和咬字發音不太準確。

最後，不知道有多少同學聽得明白嘍囉的日文呢？這次發表嘍囉用了不少心機，篇幅雖短但內容包含了嘍囉的家庭，工作和興趣，是誠意之作是也。

發表文章修改版

上星期將文章交給老師批改，之後老師給我的評價是"よくできました"，不過有部份詞語太深，擔心其他同學聽不明白，失去發表的意義，所以省卻了中段的部份，我的"dump"波鐘戰略失敗了。以下是修改後最後版本，之後要好好準備下星期的發表了。


皆さん、こんばんは、高級嘍囉です。

私の家族は五人です。両親と姉と妹がいます。犬も一匹います。

わたしはテーマパークの社員です。毎日はコンピュータセンターで働きます。仕事は易しいです、そして暇です。しかし、日曜日働きます。毎朝歩いて駅へ行きます。それから、地下鉄で会社へ行きます。40分ぐらいかかります。

私は日本のアニメーションとビデオゲームが好きですから、日本語を勉強しています。アニメーションのソングも好きです。一番好きの男の歌手と女の歌手は水木一郎さんと堀江美都子さんです。今年の五月に、水木さんと堀江さんはコンサートの出演に香港へ来ます。わたしはもう一度二人に会いたいですから、コンサートの切符を買いました。友達と一緒に見ます。

以上、ありがとうございます。

飯局

昨晚約了舊同事飯局，同席有前上司太陽蛋和大佬晴朗兄。今次飯局的主要目的，是為了將要遠征賭埠發展的太陽蛋踐別。

席間，講到應否讀個學位的問題，兩位持相反意見：身處管理階層的太陽蛋，深感一張沙紙的重要；而一向閒雲野鶴、笑傲江湖的晴朗兄，對一紙浮名不感興趣。而嘍囉有幸遲左幾年出世，一早囉左個量產學位，所以在此問題上冇乜意見。而吸引嘍囉思考的，是晴朗兄的一句「只需要向自己負責」。

以前，嘍囉真的以為做人只要能做到「只需要向自己負責」就已經足夠。不過近年發生的許多事情，週遭的人的行為，不論是好是壞，是有意還是無意，都會對你做成影響。原來「自己」並不是只包括自已一個，是我中有你，你中有我。「向自己負責」所負的責，究竟有多大多重，當中的尺寸應該如何決定呢？思考中...