滑鼠與廁紙

今日閉門冥想完畢，想用廁紙清理的時候，發覺右手食指軟弱無力，差點不能完成動作，我想是因為近排打機打得太多，疲勞過度引起。同時指頭也感到隱隱作痛，想是按鍵太多做成，睇黎都要好好休閒一下先得喇。

生活點滴

打爆左PS2隻機戰OGS，OG1同OG2都爆左2週目，OG2.5就爆左一次，經歷個幾兩個月，終於可以將隻game disc由部PS2度囉返出黎。爆左機完成左個目標，個人好似冇哂方向，要快d搵個新目標先得。

唔知點解烚親蛋都會爆蛋，d蛋白蛋黃流哂出黎，之前我係水滾先落蛋，最近先知原來要冷水落蛋，否則好易會爆。

之前講過因為無錢而要係屋企食自己，慢慢咁就習慣左自己整野食，不過我好少開爐火，多數都係整三文治同沙律，預備好青瓜、蕃茄、火腿、碎蛋、吞拿魚、生菜、芝士等三文治材料放在雪櫃，隨時可以整黎食，暫時都仲未食厭。間唔中又整下沙律，材料有薯仔、黃蘋果、紅腰豆、粟米、生菜、碎蛋等，有時用蛋黃醬有時用意大利沙律醬，目前仲摸索緊可以玩乜新花款，基本上我當煮野食係一個遊戲咁玩，通常征服左一個菜式後就好似爆左機咁，要另外搵過個新目標再玩過。

今朝磅下有幾重，得205磅，少左出街食飯真係會人都輕d。

小狗見我煮薯仔，扮哂野唔食狗糧，等我仲以為佢有病，點知比左幾塊薯仔佢食之後就變得龍精虎猛，馬上成盆狗糧食哂，你都算古惑喇你。

無貨交

成個月無出新文章，可能是因為受blog界一片休息風所影響；也可能是因為太陽黑子的週期活動，引至這個處於北回歸線上的都市內的人們失去了活力；也可能是最近吃少了一半米飯，所以個人變得無氣無力。
渣沽兄最近小休復出，文章依然精彩，讀畢後不禁精神一震，要出編文發洩一下，免得流鼻血就唔好喇。